ESQUERDA UNIDA PRESENTOU UNHA MOCIÓN NO CONCELLO DE PONTEAREAS EN APOIO A LAFKIR KAZIZA E O POBO SAHARAUI

Esquerda Unida de Ponteareas rexistrou no Concello unha moción para que o pleno rezoñeza a loita de Lafkir Kaziza, en folga de fame esixindo a liberación de 22 presos políticos saharauis.

O pasado venres 1 de xuño ás 8:00 da mañá un mozo saharaui decidiu iniciar unha folga de fame indefinida enfronte da embaixada de Marrocos en Madrid, para esixir a liberación dos presos políticos saharauís.

Este mozo activista ten 21 anos de idade e participou na protesta pacífica que tivo lugar nos arredores do Aiún en outubro de 2010, no campamento de Gdeim Izik ou, como se lle coñece internacionalmente, Campamento da Dignidade. Foi ferido cando se produciu o desmantelamento e posteriormente detido, sufrindo torturas e humillacións por parte das autoridades marroquís.

Leva case unha semana sen comer e a súa saúde empeza a deteriorarse  considerablemente. Está a utilizar o seu corpo como método de protesta pacífica como antes fixeron outros grandes loitadores pola democracia e a liberdade como Gandhi, Nelson Mandela e a heroína do pobo saharauí Aminetu Haidar.

Actualmente, o Sáhara Occidental está ocupado por Marrocos a pesar de ser un territorio non autónomo, pendente de descolonizar desde que a ONU así o reflectise en 1960 na Resolución 1542 (XV) da Asemblea Xeral da ONU, de 15 de decembro do devandito ano.

Na moción presentada, Esquerda Unida solicita ao Concello de Ponteareas que recoñeza a loita de Lafkir Kaziza, que se adhira ao manifesto sobre a súa folga de fame e que recoñeza a loita do pobo saharaui pola súa autodeterminación.

ESQUERDA UNIDA SOLIDARÍZASE COS TRABALLADORES DE LIMPEZA EN PONTEAREAS

Esquerda Unida esixe o mantemento de tódos os postos de traballo e a equiparación salarial cos demáis  traballadores da  provincia.

EU lamenta a desfachatez dos partidos da corporación que aprobaron vai anos por unanimidade a privatización do servizo municipal de limpeza e agora pídenlle ao alcalde que resolva o problema.

 Unha causa inmediata do problema compre buscala na pretensión do PP de recortar orzamentariamente a partida destinada á recollida do lixo, sen importarlle soldos e despedimentos, tal como recoñece o alcalde públicamente.

 Dende Esquerda Unida consideramos urxente remunicipalizar o servizo de recollida do lixo e organizalo fora de SOGAMA, para facelo de xeito máis ecolóxico e barato.

ESQUERDA UNIDA DE PONTEAREAS DENUNCIA A FALTA DE TRANSPARENCIA DO GOBERNO MUNICIPAL

Esquerda Unida de Ponteareas rexistrou este venres, 1 de xuño, unha solicitude reclamando que o anuncio da aprobación inicial do Regulamento do Consello Escolar Municipal sexa exposta publicamente no taboleiro municipal.

A corporación municipal de Ponteareas aprobou  o pasado 17 de abril a reforma do Regulamento do Consello Escolar Municipal, feito que foi publicado no B.O.P. con data de 10 de maio.

Asemade, tamén se aprobou sometelo a exposición pública durante trinta días mediante anuncio que se publicaría no B.O.P. e no taboleiro municipal, cousa que soamente foi cumprida en parte, xa que si ben é certo que apareceu publicado no B.O.P., non foi, a día de hoxe, exposto no taboleiro municipal.

Este feito, ademais de contradicir os propios acordos da Corporación Municipal, vai en detrimento da necesaria transparencia e información que se espera dun goberno que se di democrático.

O Consello Escolar Municipal, é o máximo órgano consultivo do Concello en materia de educación, polo que é do interese de tódolos veciños e veciñas a norma que regula o seu funcionamento. Ao incumprir o acordo da corporación municipal de expoñer no taboleiro de anuncios do Concello o anuncio da aprobación do novo regulamento, o Goberno Municipal está dificultando aos veciños e veciñas de Ponteareas o seu lexítimo dereito á información e a facer alegacións a este regulamento.

É por isto, que dende Esquerda Unida de Ponteareas rexistramos no Concello unha solicitude dirixida  ao Alcalde para que se cumpra a legalidade e se expoña no taboleiro do concello o anuncio da aprobación do regulamento. Así mesmo, tamén esiximos nesta solicitude que o prazo de alegacións se amplíe e os trinta días para facer alegacións comecen a contar dende a súa publicación no taboleiro municipal.

ESQUERDA UNIDA DE PONTEAREAS APOIA A FOLGA NA EDUCACIÓN CONVOCADA PARA O 22 DE MAIO

ESQUERDA UNIDA ASISTIRÁ ÁS MOBILIZACIÓNS CONVOCADAS EN PONTEAREAS PARA ESE DÍA.

Esquerda Unida de Ponteareas fai un chamamento público a apoiar a folga no sector do ensino, convocada para o vindeiro 22 de maio pola Plataforma Estatal Pola Escola Pública.

Esquerda Unida considera que a política de recortes imposta polo goberno do PP, que supón para os orzamentos de educación unha diminución de entre o 25% e o 30%  é o maior ataque contra a educación pública levado nos últimos anos e levará a un retroceso histórico no ensino.

Estes recortes no ensino público provocarán a masificación nas aulas, a paralización de novos ciclos de Formación Profesional, un importante recorte de persoal e perda de dereitos laborais. A intencionalidade está para nós ben clara: o inevitable empeoramento da calidade do ensino público que provocarán estes recortes repercutirá nun transvase de alumnado dende o ensino público cara ao privado, o que á súa vez servirá de escusa para novos recortes ao ensino público. Deste xeito, estes recortes levarán a que soamente quen teña capacidade económica poderá acceder a unha educación de calidade.

Nesta mesma liña se atopan a subida das taxas universitarias nun 66% e a diminución nun 12% do orzamento destinado a becas o que fará practicamente imposible o acceso da mocidade de familia traballadora aos estudos universitarios.

 Atopámonos ante unha nova agresión contra os dereitos da clase traballadora perpetrada polos gobernos monicreques dos grandes intereses económicos. A gravidade destas agresións esixen da unidade das e dos traballadores, dos estudantes e das súas organizacións. Por iso lamentamos que unha vez máis os sindicatos foran incapaces de acadar a unidade de acción para esta mobilización. Non valen escusas: a división das organizacións sindicais debilita a mobilización e polo tanto facilítalle o camiño aos que queren acabar coa educación pública.

 Esquerda Unida de Ponteareas chama á participar na manifestación do vindeiro martes 22 de maio ás 20:00, convocada pola FANPO e apoiadas polas Plataformas pola Defensa do Ensino Público.

MOCIÓN POLA XESTIÓN PÚBLICA DA E.T.A.P. DE PONTEAREAS

Esquerda Unida rexistrou non día de onte no Concello de Ponteareas unha moción pedindo a xestión pública da recentemente construída estación depuradora de auga potable de Ponteareas. Depuradora que, por certo, construíuse despois de anos de reclamacións dos veciños pola mala calidade da auga do servizo municipal.

Estes días  dende o goberno municipal comunicouse que a E.T.A.P. de Ponteareas atopábase rematada e en fase de probas e que soamente faltaba adxudicar a xestión.

Esquerda Unida considera que a xestión da auga, como dereito humano básico, debe permanecer allea a calquera interese de lucro.

Débese garantir “a eficacia, a solidariedade, a eficiencia, a equidade, o control democrático dos operadores dos servizos da auga e a conservación dos ecosistemas acuáticos” . O debate científico e a experiencia cidadá das últimas décadas demostra que este modelo soamente pode ser garantido plenamente a través da xestión pública da auga.

Ademais, dende Esquerda Unida opoñémonos si cabe con máis motivo aínda agora que se recortan orzamentos públicos a tódolos niveis, a que unha vez máis, unha obra financiada con diñeiro público sirva para lucro dunha empresa privada.

Consideramos que a xestión da auga debería ser pública na súa totalidade: dende a captación ata á chegada da auga aos usuarios, polo que debería ser tamén de xestión pública a captación e distribución da auga potable, actualmente cedida á  empresa Aquagest ata o ano 2020.

MANIFESTO 1º DE MAIO

O 1º de Maio é unha data especialmente simbólica para a clase traballadora de todo o mundo. Con ela lembramos e recuperamos a heroica loita dos traballadores asasinados pola patronal en Chicago en demanda da xornada de oito horas, aló polo ano 1886.

Hoxe temos que loitar con mais forza que nunca, xa que o ataque que estamos a sufrir por parte do capital recorda o salvaxismo patronal do século XIX.

Os colectivos sociais máis desfavorecidos, mulleres, emigrantes, xuventude, persoas maiores, estudantes, proletarios, en definitiva a clase traballadora, sufrimos en primeira liña a explotación laboral e social, o despoxo dos dereitos máis básicos, a exclusión, a precariedade,a temporalidade, a marxinación, o paro… nun sistema capitalista sostido e xestionado polos mercados e políticos profesionais, a patronal, a banca, as grandes multinacionais.

Novamente as mulleres son as peor paradas coa reforma laboral, xa que prexudica seriamente os dereitos de conciliación da vida persoal e profesional. Coa nova formula do contrato a  tempo parcial e coa ampliación do mesmo a través da posibilidade de realizar horas extraordinarias, se precariza máis se cabe a realidade laboral das mulleres, xa que concentran o 77% deste tipo de contratos. Ao igual que acontece coa retirada das bonificacións para a súa reincorporación  tras a baixa de maternidade, o que supón novamente pechar a porta a inclusión laboral das mulleres, como tamén, os recortes nos servizos sociais por partida dobre.

Están degradando e recortando todo tipo de dereitos laborais, sociais, sindicais e humanos acadados pola loita da clase obreira e que en ningún momento chegaron a ser suficientes.

Hoxe temos que traballar máis para cobrar menos, temos que traballar máis anos para ter dereito a unha pensión máis pequena, obrígannos a asinar contratos en branco podendo botarnos á rúa libremente e sen indemnización, erradicaron o referente dos convenios colectivos que poñían freo os abusos das empresas.

Non podemos seguir aturando a política económica e antisocial imposta polo capital coa complicidade dos gobernos, non son os donos das nosas vidas.

A consecuencia da imposición destas medidas  por parte dos partidos dos mercados son, mais de 275.000 desempregadas/os en Galicia, mais de 5.700 desempregadas/os na Comarca do Condado e mais de 3.200 no Concello de Ponteareas, consecuencias tamén son o estado lamentable no que se atopan os servizos públicos básicos como auga, sanidade, educación, dependencia e un longo etc., que a maioria padecemos.

Mentres acontece isto o goberno español por se fora pouco  declara a amnistía fiscal. Con esta amnistía, o goberno prevé ingresar 2.500 millóns de euros renunciando a perseguir o fraude fiscal que está cifrado en 75.000 millóns de euros segundo fontes dos inspectores de Facenda. Feito que contrasta coa intención do goberno de reformar o Código Penal para criminalizar a mobilización social. Por outra banda, reducirá as deducións aos impostos das empresas para lograr que as grandes sociedades paguen algo máis. Así mesmo, subirá o imposto ao recibo da luz, o gas, o butano, a gasolina e  a xustiza se se recorre á segunda instancia.

O 29M foi unha data moi importante na que a clase traballadora e clases populares saíron fortalecidas, pero son necesarias futuras mobilizacións como xermen das xustas loitas e accións organizadas, xunto coa unidade da clase traballadora, en Ponteareas, en Galicia, no Estado, en Europa e no mundo, até conseguir abolir o capitalismo por ser un sistema inxusto, depredador e antagonico cos principios de xustiza social, solidariedade e benestar do proletariado, que impide unha repartición xusta e equitativa do traballo e a riqueza.

CONTRA O CAPITALISMO, LOITA OBREIRA

CONTRA A PATRONAL, UNIDADE OBREIRA

CONTRA A DITADURA DOS MERCADOS, PODER POPULAR

POLOS DEREITOS DOS TRABALLADORAS/ES, LOITA OBREIRA

POLA CONSTRUCIÓN DUN MUNDO CON XUSTIZA SOCIAL, REPARTO DO TRABALLO,  E A RIQUEZA,  REVOLUCIÓN SOCIAL.

A PLATAFORMA 1º DE MAIO DE PONTEAREAS CONVOCA ÁS TRABALLADORAS E TRABALLADORES A MANIFESTARSE NO DÍA INTERNACIONAL DA CLASE TRABALLADORA

A Plataforma 1º de Maio, da que forman parte distintos colectivos da vila como Esquerda Unida,  XC, PCG, CSA O Fresco, Plataforma de Desempregados e Desempregadas do Condado e AMC, convocou unha manifestación que sairá dende diante do Concello de Ponteareas este martes ás 19:00 baixo o lema: “UNIDADE E LOITA OBREIRA CONTRA O CAPITAL”.

Ante o recrudecemento dos ataques aos dereitos laborais e sociais das traballadoras e traballadores que se está a producir por parte das clases dominantes utilizando aos seus gobernos títeres, é  máis importante que nunca que a clase traballadora se organice e loite polos seus intereses. Por iso, este primeiro de maio, data na que conmemoramos as loitas obreiras para conquerir a xornada de oito horas, é imprescindible que a clase traballadora mostre masivamente o seu rexeitamento a estes ataques.

Queremos denunciar tamén a mentira que se está tentando impoñer de que é necesario que todos nos esforcemos para saír da crise. O certo é que esta crise para o que está servindo é para que os propietarios do capital gañen aínda máis a costa dos dereitos laborais e sociais e como escusa para privatizar os servizos públicos, de xeito que poidan mercadear libremente con cousas tan básicas como a saúde e a educación.

Soamente coa mobilización e loita obreira pararemos as agresións do capital.

ESQUERDA UNIDA PONTEAREAS CHAMA Á MOBILIZACIÓN NO 1º DE MAIO

MANIFESTACIÓN EN PONTEAREAS NO DÍA INTERNACIONAL DA CLASE TRABALLADORA

Este 1º de Maio enfrontámonos ao ataque máis brutal e antidemocrático que sufrimos as traballadoras e traballadores en moito tempo. Presentan medidas contra a crise que son só un intento de rapiña sobre salarios, as conquistas da clase traballadora e os dereitos sociais. Non importan as persoas e os seus dereitos, senón o beneficio dos bancos e as multinacionais.

EU chama á cidadanía a participar na manifestación convocada en Ponteareas, para que este 1º de Maio sexa unha auténtica rebelión cidadá polos nosos dereitos. EU chama á mobilización hoxe e nos meses próximos por unha saída de esquerdas da crise, polo emprego, a defensa do público, o dereito á vivenda e á igualdade.

 Queremos denunciar tamén unha vez máis o despropósito de que organizacións que se fan chamar de esquerda axuden á igrexa a desfigurar o verdadeiro sentido do Día Internacional da Clase Traballadora. Isto vense repetindo durante anos, xa que estas organizacións, en troques de chamar ás traballadoras e traballadores a mobilizarse polos seus dereitos, invitan á mocidade a participar nunha romería, incluíndo os actos relixiosos no propio 1º de maio.

Esquerda Unida de Ponteareas chama á clase traballadora a participar na manifestación convocada pola Plataforma 1º de Maio, da que forma parte xunto a outros colectivos da vila. A manifestación sairá dende os Xardíns da Xiralda ás 19:00 baixo o lema “UNIDADE E LOITA OBREIRA CONTRA O CAPITALISMO”.

Noticias relacionadas co ámbito de Esquerda Unida de Ponteareas

A %d blogueros les gusta esto: