INTERVENCIÓN DE LINO COSTAS NO ACTO DE INVESTIDURA COMO CONCELLEIRO

Lino Costas, primer concelleiro de EU en Ponteareas

“Bo día, e ante todo, dar as grazas a todas as veciñas e veciños que, co seu voto a EU-Son, fixeron posible este feito histórico que por primeira vez, ESQUERDA UNIDA estea representada no Concello de Ponteareas.

Para despexar as dúbidas, por se quedara algunha, quero dicir que EU-Son vota a favor da investidura como alcalde do candidato do BNG, máis non forma parte da Comisión de Goberno. Esta foi unha decisión aprobada unanimemente na nosa Asemblea Municipal, decisión que eu comparto ao 100%.

A nosa decisión está motivada, en primeiro lugar, porque todas e todos coincidíamos na necesidade de desaloxar da alcaldía á dereita que leva gobernando dende sempre en Ponteareas coas súas consabidas prácticas escurantistas e caciquís que a caracterizan. Para poder avanzar cara a un Concello que de verdade estea ao servizo da veciñanza.

Por outra banda, tomamos a decisión de non formar parte da Comisión de Goberno porque somos conscientes da necesidade de que EU teña a súa propia voz no Concello. Se formáramos parte da Comisión de Goberno, poderían darse dúas situacións distintas: ou mantemos a nosa actuación limitada polos acordos que se tomen na Comisión de Goberno -na que estaríamos na máis absoluta minoría-, ou mantemos unha postura que, dadas as nosas diferenzas políticas cos outros partidos que xa forman parte da Comisión de Goberno, podería ser, as máis das veces, discordante con esta comisión, o que daría a imaxe de desunión no Goberno Municipal, que é o que máis lle interesa á dereita.

Isto non quere dicir que EU-Son, vaia ter unha actitude destrutiva con respecto á futura Comisión de Goberno. Apoiaremos o posicionarémonos en contra das súas decisións, dependendo unicamente de que estas nos parezan xustas ou non. E quero lembrar, que toda a miña actuación coma concelleiro, estará dirixida en todo momento pola Asemblea Municipal de EU-Son, instrumento do que forman parte toda a afiliación de EU, ademais de outras persoas de esquerdas.

Había quen, na campaña electoral, pedía que non se votara a EU, porque este non sería un voto útil. Nós sempre defendemos que votar a ESQUERDA UNIDA, por ser unha organización centrada nos intereses da clase traballadora, era o voto máis útil. Pero ademais, desta volta o voto a ESQUERDA UNIDA, foi útil para desaloxar ao PP da alcaldía do Concello de Ponteareas.

A entrada de EU no Concello de Ponteareas é un avance, sen dúbida, para a maioría social traballadora en xeral, e para a de Ponteareas en particular, independentemente de que nos votara a nós ou non. Estamos, sen dúbida, ante unha gran responsabilidade e poñeremos, e digo poñeremos porque sei que estarei apoiado no meu traballo institucional por tódalas compañeiras e compañeiros, todo o noso empeño e o noso esforzo para non defraudar a todas aquelas persoas que nos deron a súa confianza e acadar que cada vez sexan máis as que confíen en EU.

Grazas e saúde”.

SATISFACCIÓN EN ESQUERDA UNIDA-SON POLA ENTRADA NO CONCELLO DE PONTEAREAS

NO QUE DE EU-SON DEPENDA O PP NON TERÁ A ALCALDÍA

Esquerda Unida foi premiada nestas eleccións locais polo seu traballo constante na defensa da maioría social traballadora, ao obter por primeira vez un concelleiro na vila, que ven a recaer no Coordinador Local desta formación, Lino Costas.

Dende Esquerda Unida-Son, queremos manifestar o noso agradecemento á confianza depositada en nos, confianza que esta organización de ningún xeito vai a defraudar e que entendemos coma un mandato veciñal para traballar aínda máis arreo na defensa do noso concello e da maioría social traballadora. Queremos salientar e agradecer tamén o intenso traballo a militantes e simpatizantes no desenvolvemento da campaña electoral.

Por outra banda, a perda de 1412 votos, por parte do PP e de 341 por parte de ACIP supón un importante retroceso da dereita máis rancia no Concello. Este resultado, trae como consecuencia o feito, tamén histórico, da perda por estas dúas formacións da maioría absoluta no Concello, ao sumar entre as dúas formacións 10 concelleiros, fronte aos 11 do resto dos partidos.

Dende Esquerda Unida-Son, queremos manifestar que faremos o que estea na nosa man para impedir que o PP en solitario ou en unión con ACIP logre a alcaldía.

Todas estas cuestións, serán debatidas o máis cedo posible polo Consello Político Local de EU en Ponteareas, e logo na Asemblea Municipal de EU-Son, órgano aberto á participación de persoas alleas a EU, e que será o encargado de dirixir a liña política desta organización no Concello.

YOLANDA DÍAZ: ESQUERDA UNIDA-SON É A ÚNICA FORZA POLÍTICA QUE ESTÁ EN CONTRA DOS CORRUPTOS E TAMÉN DOS CORRUPTORES

ONTE CELEBROUSE EN PONTEAREAS UN ACTO NO CENTRO SPORTIVO DE ESQUERDA UNIDA-OS VERDES SON

Este martes, Esquerda Unida-Os Verdes Son, celebrou un acto de campaña no Centro Artístico Sportivo de Ponteareas, no que interviñeron, Yolanda Díaz, vicevoceira de AGE no Parlamento Galego e Coordinadora Nacional de EU, Patricia Pardo e Lino Costas, número dous e candidato á alcaldía respectivamente na lista de EU-Son no Concello de Ponteareas. Candidatura froito da coalición a nivel nacional entre Anova, Esquerda Unida e Os Verdes.

Nas súa intervención, ante ducias de veciñas e veciños de Ponteareas, Yolanda Díaz pediu o voto para a candidatura de EU-Son en Ponteareas, e lembrou que “EU-Son é a única forza política que, ademais de estar con tódalas consecuencias en contra da corrupción política, non lle treme o pulso á hora de denunciar tamén aos corruptores”. Lembrou tamén que un cambio real, pasa necesariamente polo voto á esquerda e pola mobilización social.

Patricia Pardo, pola súa parte, fixo un repaso polas distintas mobilizacións que historicamente levanse feito en Ponteareas, mobilizacións que Esquerda Unida sempre apoiou e animou á veciñanza a seguir opoñéndose ás políticas caciquís e escurantistas da dereita para acadar un cambio auténtico na vila. Reivindicou tamén que o voto para EU-Son é o voto realmente útil, o voto para comezar a construír unha alternativa e transformar realmente o Concello de Ponteareas.

Á súa vez, Lino Costas manifestou que estamos ás portas do feito histórico de que unha forza autenticamente de esquerda coma EU-Son vaia a ter por primeira vez representación no Concello de Ponteareas. Manifestou tamén o apoio de EU-Son á loita dos traballadores e traballadoras de FCC polos seus dereitos laborais, á da veciñanza da Freixa por manter un cinto de seguridade entre as súas casas e o futuro polígono industrial da Lomba.

Todos eles pediron o voto para EU-Son en Ponteareas, pola súa aposta decidida pola rexeneración da política local e pola defensa dos intereses da maioría social traballadora e polo Medio Ambiente.

MITIN EU-SON PONTEAREAS

YOLANDA DÍAZ INTERVIRÁ NO MITIN DE EU-SON O VINDEIRO MARTES 19

A DEPUTADA DE AGE ASISTIRÁ PARA DAR O SEU APOIO Á CANDIDATURA DE PONTEAREAS

Nestas Eleccións Municipais de 2015, Esquerda Unida de Ponteareas, confórmase como a forza que garantirá no concello a defensa da veciñanza e do noso entorno.

Unha candidatura de mulleres e homes comprometidos cos valores da esquerda, a defensa das traballadoras e dos traballadores, o feminismo e o medio ambiente.

EU-son preséntase a estas eleccións cun completo programa elaborado participativamente. Un programa do que se falará no Mitin do vindeiro martes 19 ás 20:30 no Centro Artístico Sportivo de Ponteareas. Un programa de esquerdas para a maioría social.

Neste acto, presentado por Pablo Fernández, candidato nº 3 da lista de EU-son, intervirá a Coordinadora Nacional de ESQUERDA UNIDA e deputada de AGE no Parlamento de Galicia, Yolanda Díaz. De seguido, Patricia Pardo, nº 2 na candidatura e Lino Costas, candidato de EU-son á alcaldía de Ponteareas.

EVENTO EN FACEBOOK

PROGRAMA NUN MINUTO – EU-son Democracia participativa

EU-son presenta o seu programa para as eleccións do 24 de maio nun minuto. Aquí tan só é un minuto, pero no enlace que aparece máis abaixo podes consultar o programa completo. Un programa de esquerdas para a maioría social.

PROGRAMA

TV

ESQUERDA UNIDA – OS VERDES SON PRESENTA A SÚA CANDIDATURA EN PONTEAREAS

INTERVIRÁ EVA SOLLA, DEPUTADA DE AGE NO PARLAMENTO DE GALICIA

NESTE ACTO FALARASE TAMÉN DA ASEMBLEA MUNICIPAL DE EU

Nestas Eleccións Municipais de 2015, Esquerda Unida de Ponteareas, confórmase como EU-son, a forza que garantirá no concello a defensa da nosa xente e do noso entorno.

Unha candidatura de mulleres e homes comprometidos cos valores da esquerda, a defensa das traballadoras e dos traballadores, o feminismo e o medio ambiente; encabezada por Lino Costas, traballador do metal, Coordinador Local de EU en Ponteareas e Patricia Pardo, militante feminista, licenciada en bioloxía e teleoperadora.

EU-son preséntase a estas eleccións cun completo programa elaborado participativamente.

O traballo institucional da representación de Esquerda Unida no Concello rexerase pola Asemblea Municipal de EU, instrumento onde poderán participar con pleno dereito todas aquelas veciñas e veciños que se identifiquen cos valores da esquerda. Esta Asemblea Municipal de EU fará as propostas que as nosas concelleiras e concelleiros presentarán no Pleno Municipal e xestionará o seu traballo, de xeito que este sexa totalmente transparente e estea referenciado nas necesidades reais da xente da localidade.

A presentación da candidatura terá lugar no Centro Artístico Sportivo o vindeiro venres 8 de maio ás 20:30 e contará coa presenza inestimable da deputada de AGE no Parlamento de Galicia, Eva Solla.

É tempo de ESQUERDA – Lino Costas

Lino Costas, candidato por EU-son Ponteareas ás Eleccións Municipais do 24 de maio de 2015, na manifestación do 1M.

É tempo de ESQUERDA – Patricia Pardo

Patricia Pardo, candidata por EU-son Ponteareas ás Eleccións Municipais do 24 de maio de 2015, na manifestación do 1M.

ESQUERDA UNIDA CONTEMPLA NO SEU PROGRAMA MEDIDAS DE ATENCIÓN ÁS PERSOAS MAIORES

DENDE A CORPORACIÓN MUNICIPAL, EU-SON ESIXIRÁ Á INCORPORACIÓN DA XERIATRÍA E A XERONTOLOXÍA AO CENTRO DE ATENCIÓN PRIMARIA DE PONTEAREAS

As persoas maiores, unha vez que abandonan o mercado laboral non deben ser aparcadas. Son moitas as políticas de apoio a este colectivo que se poden facer dende o Concello. A primeira de elas é detectar as necesidades e inquietudes das persoas maiores e esixir solucións.

No programa de Esquerda Unida de Ponteareas, contémplanse medidas para facilitar a participación das persoas maiores, a través da creación dun Consello Municipal de Servizos Sociais, para que poidan ter voz en cuestións que lles afectan máis directamente.

É necesario mellorar a dotación do Centro de Día, potenciar o servizo de atención a domicilio, incluíndo un servizo de tele-asistencia a persoas maiores que vivan soas e crear unha nova Residencia da Terceira Idade de titularidade e xestión pública para cubrir as necesidades actuais.

O Coordinador Local de EU e candidato á alcaldía de Ponteareas, Lino Costas, considera que a administración local debe potenciar un envellecemento activo saudable: o dereito ao ocio, á formación, á cultura, á práctica de actividades físicas e deportivas que fan que as persoas maiores podan intervir activamente na vida económica, cultural e política da localidade.

Sobre estas cuestións, propoñemos a creación dunha unidade municipal de control de servizos a maiores, establecer un turismo social de calidade, promover o asociacionismo das persoas maiores nos diferentes campos e a creación dun “fondo ce coñecemento solidario” onde as persoas maiores podan transmitir os seus coñecementos ás novas xeracións.

ESQUERDA UNIDA LEVA NO SEU PROGRAMA A CREACIÓN DUNHA BOLSA DE ALUGUER SOCIAL

NO CONCELLO DE PONTEAREAS EXISTEN MAIS 2000 VIVENDAS DESOCUPADAS

No actual contexto de aumento da desprotección social, cada vez máis persoas se atopan en situación de vulnerabilidade, o que fai perigar o acceso á vivenda ou que, en moitos casos, o seu custe sexa insoportable para a economía familiar.

A existencia de vivendas baleiras é unha dilapidación social e territorial insostible. No Concello de Ponteareas existen mais 2000 vivendas desocupadas, segundo datos do INE. Por iso a grande importancia da realización dun rexistro do estado das vivendas (ocupadas, de segunda residencia, desocupadas ou baleiras, postas no mercado de venda ou aluguer…), facer un diagnóstico das características xerais e de poñer en práctica unha nova forma de facer política de vivenda. Esquerda Unida aposta por construír en función da necesidade da poboación e non por intereses especulativos.

Para paliar esta situación, Esquerda Unida leva no seu programa a creación dunha Bolsa de Aluguer Social, para aquelas persoas que se atopen en dificultades para acceder ao dereito á vivenda.

As vivendas baleiras que non se acollan a esta bolsa, terán un recargo do 50% sobre a cota líquida do ibi, o máximo permitido pola lei.

Propón para isto un Plan de Aluguer Municipal ao que se poderían acoller persoas ou entidades propietarias de vivendas baleiras e que, ao mesmo tempo, veríanse beneficiadas cun sistema de garantías en forma de póliza de seguros que cubrirá danos e impagos.

Pola contra, aquelas vivendas baleiras que non se acollan ao Plan de Aluguer Municipal, terían un recargo do 50% na cota líquida do Imposto de Bens Inmobles cuxos ingresos irían destinados a garantir o dereito á vivenda.

Deste xeito, Esquerda Unida posiciónase claramente a favor dos intereses da maioría social traballadora, que está a sufrir as consecuencias da actual crise económica, produto en boa parte das prácticas especulativas coa vivenda.